न्यू बुटवल वर्दघाट विद्युत् सबस्टेशन निर्माण सम्पन्न
इन्भेष्टोपेपर । श्रावण ०७, २०७८
नवलपरासी । पश्चिम नवलपरासीको सुनवल बडेरामा निर्माणधीन न्यु बुटवल–बर्दघाट २२० केभी विद्युत सबस्टेशन निर्माण कार्य सम्पन्न भएको छ ।
नेपाल विद्युत् प्राधिकरणको आयोजनामा कालीगण्डकी करिडोर प्रशारण लाईन अन्तर्गतको सुनवल नगरपालिका वार्ड नम्बर १३ सूर्यबस्तीमा निर्माणाधिन न्यु बुटवल–वर्दघाट २२० केभी प्रशारण लाईन सबस्टेशनको निर्माण कार्य सम्पन्न भई परिक्षणको तयारीमा रहेको न्यु बुटवल–वर्दघाट २२० केभी प्रशारण लाईन सबस्टेशन निर्माण आयोजनाका प्रमुख विश्वरन्जन मिश्राले बताउनु भएको छ ।
सन २०२० अक्टोवर भित्र निर्माण कार्य सकिसक्नु पर्ने गरि २०१७ को अक्टोवर देखि विद्युत सब स्टेशन निर्माणको कार्य शुरु भएको उक्त आयोजनाको निर्माणको काम अहिले सम्पन्न भएको न्यु बुटवल–वर्दघाट २२० केवि प्रसारण लाईन सबस्टेशन निर्माण आयोजनाका सूचना अधिकृत अशोक पोखरेलले बताउनुभयो ।
आयोजनाका सूचना अधिकृत पोखरेलका अनुसार आयोजनाले काम शुरु गरे पछि कोभिड संक्रमणका कारण दुई पटकको बन्दाबन्दी, भारतीय नाकाबन्दी, केही समय स्थानीयवासीको विरोध, अवरोधका बावजुद आयोजनाले २८ महिनामा सबस्टेशनको भौतिक निर्माण कार्य सम्पन्न गरी अब परीक्षणको तयारीमा रहेको छ ।
टावरहरुको निर्माण, ट्रंसफरर्मर एवं अन्य उपकरणहरुको जडान, सबस्टेशन नियंत्रण भवन उपकरणहरुको जडान, सबस्टेशनको प्रशासनिक भवन, कर्मचारी आवास भवन लगायतका भौतिक निर्माणका कामहरु सम्पन्न भएको बताईएको छ ।
सुनवल नगरपालिकाको वार्ड नम्वर १३ सूर्यबस्तीमा करिब २० विगाहा क्षेत्रफलमा उक्त आयोजनाको पूर्वाधार निर्माण भएको छ । एशियाली विकास बैंकको ऋण सहयोगमा बन्न लागेको विद्युत् प्रशारण लाईनको सबस्टेशनको निर्माण ठेक्का भारतीय कम्पनी टाटा प्रोजेक्टस लिमिटेडले लिएको थियो ।
एक अर्ब ८० लाख रुपियाँको लागतमा बन्न लागेको यस विद्युत सबस्टेशनले कालिगण्डकी क्षेत्रबाट उत्पादित विद्युत मध्य तराईका निर्माणाधीन शहरहरुमा प्रसारण गर्ने छ । यो सबस्टेशन निर्माण पछि कालिडण्डकी बेसीनबाट आउने विद्युत राष्ट्रिय प्रशासण लाईनमा जाडिएर नवलपरासी, बुटवल भैरहवा लगायतका क्षेत्रहरुमा विद्युत प्रसारणको काम सहज हुने छ । (गाेरखापत्र दैनिकबाट)
