स्वदेशी उत्पादन नष्ट, सवा अर्बको तरकारी र फलफूल आयात
इन्भेष्टोपेपर । जेष्ठ २३, २०७७
भैरहवा । लकडाउनको समयमा भैरहवा भन्सार कार्यालयबाट हरियो तरकारी र फलफूलको आयात उच्च देखिएको छ तर प्रदेश ५ अन्तर्गत कतिपय जिल्लाका किसान आफ्नो बारीमा उत्पादन गरेको तरकारी बजारसम्म पु¥याउन नसकेर नष्ट गर्न बाध्य छन् ।
चालू आर्थिक वर्ष २०७६/७७ को चैत ११ देखि जेठ २० गतेसम्म ६९ दिनको अवधिमा एक अर्ब २८ करोड ६८ लाख ९५ हजार बराबरको तरकारी तथा फलफूल बेलहिया नाकाबाट आयात भएको भन्सार कार्यालयको तथ्याकंले देखाएको छ ।
आर्थिक वर्ष २०७५/७६ को यही अवधिमा एक अर्ब २१ करोड ६७ लाख ५४ हजार बराबरको तरकारी तथा फलफूल यो नाकाबाट आयात भएको थियो । गत वर्षभन्दा सात करोडभन्दा बढीको तरकारी तथा फलफूल आयात भएको भन्सारको तथ्याकंले देखाएको छ । लकडाउनको ६९ दिनको अवधिमा ४५ लाख ३७ हजार मूल्यको ४३४ मेट्रिक टन हरियो सागसब्जी मात्रै भारतबाट आयात भएको छ ।
प्याजको आयात पनि बन्दाबन्दीको अवधिमा उच्च देखिएको छ । चालू आर्थिक वर्षको चैत ११ देखि जेठ १९ सम्म ४३ करोड ४८ लाख ५४ हजार बराबरको १२ हजार १२ मेट्रिक टन प्याज आयात भएको भैरहवा भन्सार कार्यालयका प्रमुख भन्सार अधिकृत कमलकुमार भट्टराईले जानकारी दिए ।
लकडाउनमा गोलभेँडाको आयात पनि बढी भएको देखिएको छ । चालू आर्थिक वर्षको चैत ११ देखि जेठ २० सम्म दुई करोड ४९ लाख ३७ हजार मूल्य बराबरको दुई हजार ३२६ मेट्रिक टन आयात भएको प्रमुख भन्सार अधिकृत भट्टराईले जानकारी दिए ।
स्थानीय तरकारी तथा फलफूलको बजारीकरण नभएकाले भारतबाट आउने तरकारी तथा फलफूलको आयात उच्च भएको हो, उनले भने । त्यस्तै आलु गत चैत ११ देखि जेठ २० सम्म २५ करोड २३ लाख ८१ हजार मूल्य बराबरको १० हजार १२७ मेट्रिक टन आयात भएको भैरहवा भन्सार कार्यालयले जनाएको छ । (गोरखापत्र दैनिकबाट)
