नेपाल र जापानबीच ऐतिहासिक सम्बन्ध छ : उपराष्ट्रपति यादव

इन्भेष्टाेपेपर ।  फागुन १८, २०८१

काठमाडौं । सम्माननीय उपराष्ट्रपति रामसहाय प्रसाद यादवले नेपाल र जापानबीच ऐतिहासिक, सामाजिक एवम् सांस्कृतिक सम्बन्ध रहेको उल्लेख गर्दै सन् १९५६ मा कूटनीतिक सम्बन्ध स्थापना भएयता दुई देशबीचको सम्बन्ध थप घनिष्ट एवम् मैत्रीपूर्ण रुपमा अगाडि बढिरहेको बताउनु भएको छ ।

उपराष्ट्रपति यादवले जाइका अलमनाई एसोसिएसन अफ नेपाल (जान) को ५१औं वार्षिक समारोहलाई शनिबार काठमाडौंमा प्रमुख अतिथिका रुपमा सम्बोधन गर्दै नेपाल र जापानबीच ऐतिहासिक एवम् परम्परागत सम्बन्ध रहेको बताउनु भएको हो । 

 ‘नेपाल र जापानबीच ‘एसियाका ज्योति’ भगवान बुद्धको शिक्षाबाट प्रभावित युगौँ पुरानो सामाजिक–साँस्कृतिक सम्बन्ध छ ’ उहाँले भन्नुभयो, ‘समय–समयमा दुई देशबीच हुने गरेका उच्चस्तरीय भ्रमण तथा विचार आदानप्रदानले हाम्रो सम्बन्धलाई थप मजबुत बनाएको छ । ’

उहाँले नेपालको सामाजिक तथा आर्थिक विकासमा महत्वपूर्ण भूमिका निर्वाह गर्दै आएकोमा जापान सरकारलाई धन्यवाद दिँदै जापानी आर्थिक सहयोगका प्रमुख क्षेत्रहरूमा मानव संसाधन विकास, स्वास्थ्य, कृषि विकास, पूर्वाधार विकास, वातावरण संरक्षण, संस्कृति लगायतको रहेको बताउनुभयो । ‘नेपालले जापानको अनुभव, ज्ञान, सीप र प्रविधिबाट लाभान्वित हुन चाहेको छ ’ उपराष्ट्रपति यादवले भन्नुभयो, ‘नागढुंगा सुरुङमार्गको सुरुवातसँगै सडक पूर्वाधारको विकासमा जापानको सहयोग प्रशंसनीय छ ।’

उपराष्ट्रपति यादवले ‘जान’ का सम्पूर्ण पदाधिकारी एवम् सदस्यहरूलाई हार्दिक बधाई तथा शुभकामना व्यक्त गर्दै यो संस्था ५० वर्षयता सक्रिय रहेको जानकारी पाएर खुशी लागेको बताउनु भयो । उहाँले यो संस्थाले नेपाल र जापानबीचको परम्परागत मित्रतालाई सुमधुर बनाउँदै नेपालको विकास एवम् समृद्धिमा महत्वपूर्ण योगदान पुर्याउनु प्रशंसनीय कार्य भएको उल्लेख गर्नुभयो ।

उपराष्ट्रपति यादवले ‘जान’ ले नेपाल र जापानको सुमधुर सम्बन्धलाई जनस्तरसम्म पुर्याउन र जापानमा सिकेको ज्ञान, सीप र प्रविधिलाई नेपालको विकासमा लगाउने दिशामा पुर्याउँदै आएको योगदान महत्वपूर्ण रहेको बताउनु भयो । ‘यो संस्थाले ग्रामिण क्षेत्रमा सामुदायिक विकासका कार्यहरू पनि शुरु गर्नु सकारात्मक छ’ उहाँले भन्नुभयो, ‘यी कार्यहरूलाई थप ग्रामीण भेगमा विस्तार गर्न सक्नुपर्दछ । ’

उहाँले जापानको विदेश मन्त्रीबाट ‘फोरेन मिनिस्टर्स कमेन्डेसन अवार्ड’ प्राप्त गर्न सफल भएकोमा ‘जान’लाई हार्दिक बधाई दिँदै नेपाल र जापानबीचको मित्रतालाई अझै घनिभुत बनाउन र जापान सरकारले नेपाललाई गर्ने सहयोगबाट अधिकतम उपलब्धि हासिल गर्न संस्थाका पदाधिकारी तथा सदस्यहरूले थप महत्वपूर्ण भूमिका निर्वाह गर्नुपर्ने बताउनुभयो । उपराष्ट्रपति यादवले समारोहमा प्रशंसापत्र र मानार्थ सदस्यता प्राप्त गर्नु भएका सबैलाई हार्दिक बधाई तथा शुभकामना व्यक्त गर्दै कार्यक्रमको पूर्ण सफलता र संस्थाको उत्तरोत्तर प्रगतिको कामना समेत गर्नुभयो ।