सुरक्षा चुनौती झन् संवेदनशील : प्रधानसेनापति शर्मा

इन्भेष्टाेपेपर ।  फागुन ५, २०७९

काठमाडौं । प्रधानसेनापति प्रभुराम शर्माले सुरक्षा चुनौतीहरु झन्–झन् संवेदनशील बन्दै गइरहेको बताउनुभएको छ । साथै यसबाट पर्नसक्ने परिस्थितिको सामना गर्नका लागि सैनिकहरूलाई सीप र क्षमता दुरुस्त बनाउन निर्देशन दिनुभएको छ ।

महाशिवरात्री तथा नेपाली सेना स्थापनाको २६० औं वार्षिक उत्सवको अवसरमा सकलदर्जालाई सैनिक मुख्यालय जंगी अड्डामा सम्बोधन गर्दै शुक्रबार प्रधानसेनापति शर्माले भन्नुभयो, ‘हिजोभन्दा आज र आजभन्दा भोलि सुरक्षा चुनौती झन्–झन् संवेदनशील र पेचिलो बन्दै गइरहेको छ ।

यसबाट आइपर्न सक्ने जस्तोसुकै परिस्थितिको सफलतापूर्वक सामना गर्न सकलदर्जाले पेसागत ज्ञान, सीप र बन्दोवस्ती क्षमतालाई अझ विशिष्टिकृत र दुरुस्त बनाइ राख्नु आजको आवश्यकता हो ।’

प्रधानसेनापति शर्माले नेपाली सेना परराष्ट्र नीति र राष्ट्रिय सुरक्षा नीतिलाई आधार मानेर मित्रराष्ट्रका सेनाहरुसँगको सम्बन्ध थप सुदृढ गर्दै सहयोगका क्षेत्रहरु विस्तार गरी क्षमता अभिवृद्धि तथा दिगो सैनिक कुटनीति अनुरुप अगाडी बढ्दै गइरहेको कुरा उल्लेख गर्नुभयो ।

नेपाली सेनाद्वारा जारी गरिएको विज्ञप्ति अनुसार शर्माले नेपाल सरकार तथा नेपाली जनताको भरोसालाई थप मजबुत बनाउन विपद् व्यवस्थापन तथा उद्धार कार्यहरुको लागि उच्च पेसागत क्षमता र हौसलाका साथ सधैँ तयारी रहनु पर्ने हुँदा उपलब्ध श्रोत र साधनको सदुपयोग गर्दै कार्य गर्न निर्देशन पनि दिनुभयो ।

उहाँले राष्ट्रिय निकुञ्ज सुरक्षार्थ खट्टिएका युनिटहरुले सुरक्षा प्रणालीको समयसापेक्ष पुनरावलोकन गरी स्थानीय जनतासँग समेत सुमधुर सम्बन्ध कायम राख्दै आफूलाई सुम्पिएको जिम्मेवारी बहन गर्न निर्देशन दिनुभयो ।

प्रधानसेनापति शर्माले सुदृढ र सु–संगठित सेना नै राष्ट्रिय हितको संरक्षण र सम्वर्द्धनको आधारशीला भएको उल्लेख गर्दै आफ्नो योग्यता र क्षमतालाई सैनिक अनुशासनको परिधिभित्र रही युनिट तथा संगठनको हित हुने गरी सकारात्मक कार्यमा प्रयोग गर्न निर्देशन दिनुभयो ।

वि.स. १८१९ मा नेपाली सेनामा ५ वटा कम्पनीहरु स्थायी रुपमा खडा भएका थिए । सोही वर्षलाई आधुनिक नेपाली सेना स्थापनाको सुरुवाती वर्षका रुपमा लिँदै यसपटकको महाशिवरात्रीका दिन शनिबार २६० औं सेना दिवस मनाइँदै छ ।