चलचित्र ‘निरमाया’ को पहिलो गीत सार्वजनिक

इन्भेष्टाेपेपर ।  कार्तिक १८, २०७९

काठमाडौं । मदानी मुभिजको प्रस्तुतिमा पदम विश्वकर्मा साहित्य प्रतिष्ठानको सहकार्यमा निर्माण भएको चलचित्र ‘निरमाया’ को पहिलो गीत सार्वजनिक गरिएको छ।

परिवर्तन आफैँबाट सुरु गरौँ समाज स्वतः बदलिनेछ भन्ने मूल भाव बोकेको चलचित्रले नेपाली समाजमा जरो गाडेर बसेको छुवाछुतको मुद्दालाई उठाएको छ।

सार्वजनिक ‘मायाको रङ्ग हुँदैन’ बोलको गीतमा स्वर धर्मेन्द्र सेवान र रेखा शाहको रहेको छ। उत्तम भेटुवालको शब्द रचना रहेको गीतमा रिमेश कुमारको संगीत रहेको छ।

सार्वजनिक गीतको भिडियोमा चलचित्रका मुख्य कलाकार जेबी डिसी,अजित लामिछाने, प्रतिषा रिजाल र समृद्धि पौडेल फिचर्ड छन्।

अनन्त प्रसाद तिमल्सिनाको प्रस्तुति रहेको नेपाली सामाजिक चलचित्र ‘निरमाया’ को निर्देशन रमेश कोइरालाले गरेका हुन्। महेश तिमल्सिना कार्यकारी निर्माता रहेको चलचित्रको निर्माता रोजा तिमल्सिना र रमेश दाहाल हुन्।

चलचित्र विकास बोर्ड र ग्लोबल फोरम अगेन्स्ट कास्ट बेस्ड डिस्क्रिमिनेसन नामक संस्थाको समेत सहकार्य रहेको चलचित्र ‘निरमाया’ ले नेपाली समाजको यथार्थ कथा बोल्नेछ ।

चलचित्रमा रमेश बुढाथोकी,लय संग्रौला,जे. एन. घिमिरे, जेबी डिसी, अजित लामिछाने, प्रतिषा रिजाल, समृद्धि पौडेल, रमेश अधिकारी, अनिता केसी, गोपाल ढकाल, रामबाबु रेग्मी लगायतका कलाकारको मुख्य भूमिका रहेको छ।

चलचित्रमा राम कुमार केसीको कथा र अजित लामिछानेको लेखन रहेको छ। रवि कोइराला र जीवन पराजुलीले छायाँकन गरेको चलचित्रको सम्पादन उत्तर राना मगर र तारा थापा किम्भेले गरेका हुन् भने चलचित्रमा कविराज गहतराजको कोरियोग्राफी,अशोक खड्काको द्वन्द्व, कमल अधिकारी, रिमेश कुमारको संगीत रहेको छ।

विनयराज पौडेलको मुख्य सहायक निर्देशन रहेको चलचित्रको छायाँकन सिन्धुली,काभ्रे र रामेछापमा गरिएको हो।

नेपाल सरकारको संविधानमा १७ वर्ष अघि अन्त्यको घोषणा गरिएको जातीय छुवाछुतको घोषणा वर्तमान अवस्थामा पनि शहर केन्द्रित भएको तर गाउँ गाउँ कुना कन्दरा सम्म यसको प्रभाव अझै रही रहेको र यस चलचित्रले उक्त विषय माथि आम जन मानस र नयाँ पिँडीहरूलाई सकारात्मक सन्देश दिई समाज र सोच परिवर्तन गर्न सफल रहने विश्वास निर्माण टिमको रहेको छ।

निर्माण टिमले यस चलचित्रलाई नेपाल सरकारको सहयोगमा देशभर विभिन्न सोजहरू गरी जना चेतना जगाउने लक्ष्य लिएको छ।