एक सय दरका ४० अर्ब रुपैयाँ बराबरको नोट छाप्न बोलपत्र आह्वान

नेपाल राष्ट्र बैंकले एक सय रुपैयाँ अंकित दरका ४० करोड थान नोट छाप्न पुनः अन्तर्राष्ट्रिय बोलपत्र आह्वान गरेको छ । पहिलो पटक कात्तिक २९ गते आह्वान गरेको बोलपत्रमा कुनै पनि संस्थाले आवेदन नगरेपछि राष्ट्र बैंकले माघ १६ गते दोस्रो पटक बोलपत्र आह्वान गरेको हो ।

नेपाल राष्ट्र बैंकले ४० अर्ब रुपैयाँ बराबरको एक सय रुपैयाँ दरका ४० करोड थान नोट छाप्न बोलपत्र आह्वान गरेको हो । बाेलपत्र हाल्ने कम्पनीले नोट डिजाइन, प्रकाशन र आपुर्ति गर्नुपर्ने राष्ट्र बैंकले जानकारी गराएको छ ।

बाेलपत्रमा जनाइए अनुसार इच्छुक कम्पनीले फागुन ९ भित्र बोलपत्र पेश गर्न सक्नेछन् । बोलपत्र खरिद गरि पेश गर्नका लागि २० हजार रुपैयाँ लाग्ने छ भने उक्त रकम फिर्ता हुने छैन ।

बोलपत्र खोलिएको १२० दिनसम्म म्याद रहने छ । बोलपत्रका लागि धराैटि वापत ३ करोड १० लाख रुपैयाँ जम्मा गर्नुपर्ने राष्ट्र बैंकले जनाएको छ । बोलपत्र राष्ट्र बैंकको मुद्रा व्यवस्थापन विभाग बालुवाटारमा फागुन ९ गते खोलिने राष्ट्र बैंकले बताएको छ ।