सञ्चारमन्त्री बाँस्कोटा श्रमजीवी पत्रकारहरूकाे न्यूनतम पारिश्रमिक लागू गराउन प्रतिवद्ध

भक्तपुरः सञ्चार तथा सूचना प्रविधि मन्त्री गोकुल बाँस्कोटाले प्रत्येक सञ्चार माध्यममा श्रमजीवी पत्रकारहरुको न्यूनतम पारिश्रमिक लागू गराएरै छाड्ने बताएका छन् ।

शनिबार नेपाल पत्रकार महासंघ भक्तपुर जिल्ला शाखाको २१ औं साधारण सभाको उद्घाटन गर्दै उनले श्रमजीवी पत्रकारहरु एवं कर्मचारीको न्यूनतम पारिश्रमिक लागू गर्नबाट सरकार कुनै हालतमा पछि नहट्ने बताएका हुन् । उनले भने–“न्यूनतम पारिश्रमिक लागू भयो भने सञ्चारमन्त्रीलाई कसरी सेकाउनु पर्छ भनेर बैठक बस्दैछ रे, मन्त्री बदलिएलान्, तर नेकपा नेतृत्वको सरकार अब चार वर्ष कुनै हालतमा बदलिँदैन, जो सुकै मन्त्री भएपनि यो सरकारले श्रमजीवीको न्यूनतम पारिश्रमिक लागू गराएरै छाड्छ ।”

पत्रकारले आफ्ना पेशागत कुरा गर्नुपर्नेमा आन्दोलनकारीको माग पूरा गर भन्नु गैरजिम्मेवारी हो भन्दै उनले पत्रकारले राजनीति गर्ने हो कि, समाचार लेख्ने हो ? भने । सरकारले सबै क्षेत्रमा काम गरेपनि सरकारप्रति पूर्वाग्राही राखेर समाचार आउने गरेको टिप्पणी गर्दै उनले नेपालका मिडिया मालिकको चाहना अनुसार चल्ने गरेको बताए ।

मिडियाले पत्रकारिता नगरी सत्ता पक्ष र प्रतिपक्षको भूमिका निर्वाह गर्न थालेको टिप्पणी गर्दै उनले सरकार विरुद्ध षड्यन्त्रको अभ्यास धेरै दिन नटिक्ने विचार व्यक्त गरे । डा. गोविन्द केसीले आफ्नो मागविरुद्ध आफैं अनशन बसेको टिप्पणी गर्दै उनले नेपालको मिडिया केसीले देखाएको बालहटको पछि लागेका छन् भने ।

केसीको माग पूरा गर भनेर एउटा पत्रकारले भन्नु गलत भएको बताउँदै मन्त्री बाँस्कोटाले भने–“केसीले सोचेको कुरा उहाँ धर्तीमा एक्लै भएको भए पनि पुरा गर्न सक्नु हुन्थेन, उहाँ आफै प्रधानमन्त्री भएपनि सतप्रतिशत माग पूरा गराउन सक्नुहुन्न ।” महासंघले प्रकाशित गरेको स्मारिकाको विमोचन समेत गर्दै मन्त्री बाँस्कोटाले आफू सरकारमा हुँदा केसीको माग पुरा नगर्ने अहिले माग पूरा गर्नुपर्छ भन्ने प्रबृत्ति गलत भएको बताए ।

कार्यक्रममा प्रतिनिधिसभा सांसद महेश बस्नेतले ठूला मिडिया सरकार बिरुद्ध अपवाह फैलाएर बदनाम गराउन खोजेको आरोप लगाए । पत्रकार महासंघका केन्द्रीय अध्यक्ष गोविन्द आचार्यले प्रेस काउन्सिल र सूचना बिभागबाट हुने सबै कामलाई अब प्रदेश र स्थानीय सरकारमा हस्तान्तरण गर्नुपर्ने बताए । उनले जिल्ला जिल्लाबाट केन्द्रमा धाउँनु पर्ने अबस्थाको अब अन्त्य हुनुपर्नेमा जोड दिँदै संघीय ढाचा अनुसार प्रदेश र स्थानीय सरकारलाई अधिकार दिनुपर्नेमा जोड दिए ।

कार्यक्रममा नेपाल पत्रकार महासंघका उपाध्यक्ष दीलीप थापामागर, नेकपामा भक्तपुर अध्यक्ष बचन देउजा, नेपाली काग्रेसका जिल्ला सभापति दूर्लभ थापा, जिल्ला समन्वय समितिका प्रमुख नवराज गेलालले सञ्चार माध्यमले निष्पक्ष रुपमा समाचार सम्प्रेषण गर्नुपर्नेमा जोड दिए ।

साधारणसभामा पत्रकार महासंघ भक्तपुरको भवन निर्माण गर्ने, श्रमजीवी पत्रकार ऐन कार्यान्वयन गर्नुपर्ने, साना सञ्चार माध्यमलाई लोककल्याणकारी विज्ञापन दोब्बर गर्दै समानुपातिक बिज्ञापन प्रणाली लागू गर्नुपर्ने लगायतका ८ बुँदे घोषणा पत्र जारी गरेको महासंघ भक्तपुरका अध्यक्ष एवं कार्यक्रममा सभापति पुष्करराज बुढाथोकीले बताए । कार्यक्रममा नगद रु. दुई हजार पाँचसय रुपैयाको मैयादेवी स्मृति पत्रकारिता पुरस्कार नारायण किलम्बुलाई प्रदान गरिएको थियो ।
-रासस
Share This Via:

Investopaper

Investopaper is a financial website which provides news, articles, data, and reports related to business, finance and economics.

Leave a Reply

Your email address will not be published. Required fields are marked *