सुनको आयात तथा विक्री वितरण सुचारु गर्न माग
इन्भेष्टोपेपर । असार ०९, २०७८
नेपाल सुनचाँदी रत्न तथा आभुषण महासंघले नेपाल राष्ट्र बैंक समक्ष सुन आयातकाे काेटा र दैनिक बिक्री बितरण हुँदै आएकाे काेटा बढाउन माग गरेकाे छ ।
२०७८ बैशाख १६ गते देखि लक–डाउन घोषणा गरिए पश्चात वाणिज्य बैंकहरुले विक्री वितरण गर्ने सुनको आपूर्ति पनि बन्द भएको थियाे । अब ८ गते देखि तोकिएको बार र समयमा सुन, चाँदी गहना आदि आभुषण क्षेत्र पनि चालू भएको छ ।
अतः बैंकबाट विक्री वितरण हुने सुनको आपूर्तिलाई पनि पुनः सुचारु गर्नुपर्ने तथा साविकमा दैनिक २० के.जी. सुन विक्री वितरण हुँदै आएकोमा लामो समय पश्चात बजार खुलेको र निकट भविष्यमा नै प्रमुख चाड–पर्वहरुको समय पनि आउने भएकोले दैनिक ३० के.जी. सुन विक्री वितरणको व्यवस्था गर्न नेपाल राष्ट्र बैंक समक्ष नेपाल सुनचाँदी रत्न तथा आभुषण महासंघले अनुरोध गरेको छ ।
