भरतपुर महानगरको मेयरमा पुनः रेनु दाहाल निर्वाचित
इन्भेष्टाेपेपर । जेठ १०, २०७९काठमाण्डाैँ । सबैकाे चासाेकाे विषय रहेकाे भरतपुर महानगरको मेयरमा दोस्रो कार्यकालको लागि पाँच दलीय गठबन्धनको साझा उम्मेदवार माओवादी केन्द्रकी नेतृ रेनु दाहाल निर्वाचित हुनुभएको छ । भरतपुरमा खसेको १ लाख २७ हजार ५०८ मतमा दाहालले ५२ हजार ३० मत प्राप्त गर्नुभएको छ ।
उहाँको निकटतम प्रतिस्पर्धि नेकपा एमालेका उम्मेदवार विजय सुवेदीले ३९ हजार ५ सय ८१ मत प्राप्त गर्नुभएको छ । मेयरमा दाहाल १२ हजार ४ सय ४९ मतान्तर सहित विजय हुनुभएको हो । यस्तै मेयरका स्वतन्त्र उम्मेदवार जगन्नाथ पौडेलले १४ हजार ७ सय २८ मत ल्याउनुभएको छ ।
यस्तै महानगरको उपमेयरमा गठबन्धनकै साझा उम्मेदवार नेपाली काङग्रेसका उम्मेदवार चित्रसेन अधिकारी भारी मतका साथ विजयी हुनुभएको छ । उहाँ आफ्नो प्रतिस्पर्धि राप्रपाको उम्मेदवार हिमला गुरुङसँग २२ हजार १ सय ९१ मतान्तरले विजयी हुनुभएको हो । उपमेयरमा अधिकारीले ५२ हजार ८ सय ३ मत प्राप्त गर्नुभएको छ भने उहाँका निकटतम प्रतिस्पर्धी गुरुङले ३० हजार ६ सय १२ मत ल्याउनु भएको छ ।
महानगरपालिकाको २९ ओटा वडाहरुमध्ये नेपाली कांग्रेसले १६ ओटा वडामा जित हासिल गरेको छ भने नेकपा एमालेले ६ वटा वडामा जित प्राप्त गरेको छ ।
यस्तै नेकपा माओवादी केन्द्रले ३ ओटा वडा तथा नेकपा (एकीकृत समाजवादी)ले ३ वटा वडा जित्न सफल भएको छ । वडा नम्बर २५ मा भने वडाध्यक्ष पदमा स्वतन्त्र उम्मेदवार छबिलाल सापकोटा विजयी हुनुभएकाे छ।
