अमेरिकी दूतावासमा कार्यरत नेपालीहरू कोरोना संक्रमित
इन्भेष्टोपेपर । असार ७, २०७७
काठमाडौं । अफगानिस्तानको राजधानी काबुलस्थित अमेरिकी दूतावासका कर्मचारीमा कोरोना भाइरसको संक्रमण देखिएको छ । यहाँ काम गर्ने कूटनीतिज्ञ तथा अरु स्थानीय कर्मचारीहरुमा पनि कोरोनाको संक्रमण देखिएको अमेरिकी विदेश मन्त्रालयले जानकारी दिएको छ ।
तर विदेश मन्त्रालयले यहाँका कति जना कर्मचारीमा यसको संक्रमण देखिएको हो भन्ने बारेमा भने स्पष्ट पारेको छैन । तर पनि करिब २० जनामा यो संक्रमण देखिएको बताइएको छ ।
तीमध्येका धेरैजसो दूतावास सुरक्षामा कार्यरत नेपाली गोर्खाहरु रहेको बताइएको छ । तर दूतावासमा आवश्यक सबै स्वास्थ्य सुरक्षा मापदण्डहरु अपनाइएको बताउँदै संक्रमितहरुलाई आइसोलेसनमा राखिएको र आवश्यक स्वास्थ्य उपचारको प्रबन्ध गरिएको सो दूतावासले जनाएको छ । (रासस)
