३ खेल अगाबै बार्सिलोना २६औँ पटक लालिगा च्याम्पियन

वैशाख १६, २०७६

बार्सिलोना २६औँपटक स्पेनिस लालिगा च्याम्पियन बनेको छ । पछिल्लो १० सिजनमा  आठौँपटक लालिगा च्याम्पियन बन्नेक्रममा बार्सिलोनाले शनिबार राति लाभान्टेलाई १–० ले हरायो ।

लालिगामा अब केवल ३ खेल बाँकी छन् । दोस्रो स्थानमा रहेको एट्लेटिको म्याड्रिडसँग स्पष्ट नौ अंकको अग्रता कायम गरेपछि बार्सिलोनाले उपाधिरक्षा गरेको हो ।

बार्सिलोनाले उपाधि उचाल्दा ३५ खेलबाट ८३ अंक बटुल्यो । म्याड्रिडले समान खेलबाट ७४ अंक बनाएको छ । रियल म्याड्रिडले कीर्तिमानी रूपमा ३३ पटक लालिगा उपाधि उचालेको हो । 

१०औँपटक उपाधि चुमे मेसीले

अर्जेन्टिनी प्लेमेकर लियोनल मेसीले लगातार जादुमयी खेल प्रस्तुत गर्दा बार्सिलोनाले स्पेनिस लालिगामा अन्य क्लबलाई खासै उपाधि उचाल्ने मौका दिएको छैन । पछिल्लो एक दशकमा रियल म्याड्रिडले दुई तथा एट्लेटिको म्याड्रिडले एकपटक मात्र उपाधि चुमेका छन् ।

मेसीले आफ्नो करिअरमा १०औँपटक लालिगा उपाधि चुमे । लाभान्टेविरुद्ध पहिलो हाफमा बेन्चमा बसेका मेसीले मध्यान्तरपछि च्याम्पियनसिप गोल गरेका थिए । मेसीले प्रभावशाली प्रदर्शन गरेको खेलमा लाभान्टेले अन्तिम एक मिनेट बाँकी रहँदा बराबरी गोल गर्ने अवसर गुमाएको थियो ।

  • एजेन्सी
Share This Via:

Investopaper

Investopaper is a financial website which provides news, articles, data, and reports related to business, finance and economics.

Leave a Reply

Your email address will not be published. Required fields are marked *