लिट्मस् इन्डस्ट्रिजलाई सीमापार आफ्ना उत्पादन आपूर्ति गर्न स्वीकृति
इन्भेष्टाेपेपर । फागुन ५, २०८२
काठमाडाैँ । नेपालको तार, केबल तथा कन्डक्टर उत्पादन गर्ने उद्योग लिट्मस् इन्डस्ट्रिज लिमिटेड र भारतको पावर ग्रिड कर्पोरेशन अफ इन्डिया (पीजीसीआईएल) बीच उच्च क्षमताको विद्युत् प्रसारण लाइन आपूर्ति सम्बन्धी एक सम्झौता भएकाे छ।
पीजीसीआईएल भारतको केन्द्रीय विद्युत् प्रसारण निकाय हो, जसले देशको अन्तरराज्यीय तथा सीमापार विद्युत् प्रसारण सञ्जाल सञ्चालन गर्छ।
यस संझाैतासँगै लिट्मस् इन्डस्ट्रिज सीमापार विद्युत् प्रसारण परियोजनाका लागि चयन हुने एकमात्र नेपाली उत्पादक बनेको उक्त कम्पनीद्वारा जारी विज्ञप्तिमा उल्लेख छ ।
सम्झौता अनुसार लिट्मस् इन्डस्ट्रिजले ४०० केभी एसीएसआर मूस कन्डक्टर २,७९९ किलोमिटर उत्पादन तथा आपूर्ति गर्नेछ। यी कन्डक्टरहरू नेपालको डिडिङ्ग–ढल्केबर र भारतको बथनाहा सीमापार विद्युत् प्रसारण लाइन परियोजनामा प्रयोग गरिनेछ। उक्त प्रसारण लाइन ९०० मेगावाट क्षमताको अरुण–३ जलविद्युत् आयोजनासँग सम्बन्धित छ। नेपालमै पहिलो पटक ४०० केभी एसीएसआर मूस कन्डक्टर उत्पादन हुन लागेको हो। यसले देशको प्रविधिक तथा औद्योगिक क्षमतामा महत्वपूर्ण उपलब्धि हासिल गर्दछ।
परियोजना स्वीकृत गर्नु अघि पावर ग्रिड कर्पोरेशन अफ इन्डियाले लिट्मस् इन्डस्ट्रिजको कारखानाको गहन मूल्याङ्कन गरेको थियो। यस क्रममा उत्पादन प्रक्रिया, उत्पादन क्षमता, गुणस्तर नियन्त्रण तथा परीक्षण प्रणाली, साथै समग्र कारखाना पूर्वाधारको समीक्षा गरिएको थियो। यस गहन मूल्याङ्कनपछि लिट्मस् इन्डस्ट्रिजलाई परियोजनाका लागि कन्डक्टर आपूर्ति गर्न योग्य एकमात्र नेपाली उत्पादक का रूपमा स्वीकृति प्रदान गरिएको हो। यसरी लिट्मसले अन्तराष्ट्रिय प्रतिस्पर्धामा सामेल भएर छनोट हुनु नेपालको लागि गौरवको विषय हो।
हाल प्राप्त स्वीकृतिले लिट्मस् इन्डस्ट्रिजलाई विश्वसनीय अन्तराष्ट्रिय आपूर्तिकर्ताका रूपमा स्थापित गरेको छ। यसले नेपाली उद्योगको विस्तार हुँदै गएको भूमिका उजागर गर्छ। साथै, सीमापार ऊर्जा पूर्वाधार विकासमा नेपालको सहभागिता सशक्त बन्दै गएको संकेत पनि दिन्छ।
