चीनले ३०० एयरबस किन्नेः मूल्य ३ खर्ब ५० अर्ब अमेरिकी डलर
Investopaper, चैत्र १३, २०७५
पेरिस — चीनले युरोपेली विमान निर्माण कम्पनी ‘एयरबस’ सँग ३ सयवटा जेट किन्ने भएको छ । चिनियाँ राष्ट्रपति सी चिनफिङको फ्रान्स भ्रमणका बेला दुई पक्षबीच जेट खरिद सम्झौता भएको हो ।
राष्ट्रपति सीले ‘ए–३२०’ र ‘ए–३५० एक्सडब्लूबी’ विमान खरिदबारे सम्झौतापत्रमा हस्ताक्षर गरेको अन्तर्राष्ट्रिय सञ्चारमाध्यमहरूले जनाएका छन् । विमानको मूल्य ३ खर्ब ५० अर्ब अमेरिकी डलर पर्छ ।
अमेरिकी विमान निर्माण कम्पनी बोइङका दुइटा ‘७३७ म्याक्स’ जहाज ५ महिनाको अवधिमा दुर्घटनामा परेपछि चीनले एयरबससँग पछिल्लो सम्झौता गरेको हो । इन्डोनेसिया र इथियोपियामा भएका दुर्घटनापछि बोइङद्वारा निर्मित ‘७३७ म्याक्स’ मोडलका जेट विमानलाई उडानमा रोक लगाइएको छ ।
एयरबस बोइङको प्रतिस्पर्धी विमान निर्माण कम्पनी हो । पाँच महिनामा उही मोडलका दुइटा विमान दुर्घटना भएपछि बोइङले दुर्घटनाको कारण अनुसन्धान गरिरहेको जनाएको छ । एयरबससँगको सम्झौताले बोइङलाई ठूलो झडका लागेको छ ।
कतिपयले चीनको पछिल्लो कदमलाई अमेरिकासँगको व्यापार विवादसँग पनि जोडेर हेरेका छन् । अमेरिकाले आफ्नो प्रविधिको चीनले चोरी गरेको आरोप लगाउँदै आफ्नो देश निर्यात हुने सामानमा करवृद्धि गरेपछि क्रुद्ध चीनले पनि उस्तै कदम चालेको थियो । यद्यपि दुई देशका अधिकारीले विवाद अन्त्यका लागि भएका वार्ता सहमति नजिक पुगेको जनाएका छन् ।
चीनको नागरिक उड्डयन निकायले ‘दुइटा बोइङ ७३७ विमान उड्नासाथ दुर्घटना भएका र कारण समान भएको’ जनाउँदै वायुसेवा कम्पनीलाई ‘म्याक्स–८’ विमान नउडाउन निर्देशन दिइसकेको छ ।
एयरबसले एक विज्ञप्ति जारी गर्दै ‘चिनियाँ उड्डयन आपूर्तिसम्बन्धी कम्पनीसँग २९० वटा ए–३२० विमान र १० वटा ए–३५० एक्सडब्लूबी जेट खरिदको’ सम्झौता भएको जनाएको छ । चीनले खरिद गर्न लागेका विमानको मूल्य करिब ३ खर्ब ५० अर्ब अमेरिकी डलर पर्ने अन्तर्राष्ट्रिय सञ्चारमाध्यमले जनाएका छन् ।
‘ए–३२०’ विमानको सिट क्षमता १८० देखि १८६ छ भने ‘ए–३५० एक्सडब्लूबी’ मा एकपटकमा ३ सयजनाले यात्रा गर्न सक्छन् । याे समाचार कान्तिपुरमा छ ।
